إن كنت تسأل يارفيقي عن الحال
مالي على كتمانها إي حيله
الصبر عن بوح الإحاسيس قتال
والبوح في بعض المواقف فشيله
لو كل مايطري على البال ينقال
ماكان شفت إن الثقيله ثقيله
أبطيت أكافح ضيقة البال بالبال
وأدفع بلى هاجوسها كل ليله
لين أقبلت مثل السحابه بهمال
تشفي غليل اللي تزايد غليله
طاحت ولا وفق من حناياك منزال
وأبطلبك ياخوي تكمى المخيله
وإن قيل ترعد قلهم: صوت زلزال
وإن قيل تبرق شف لها إي حيله
مابي تناقلها هل القيل والقال
وتصير من بعد القصيره طويله
ياخوي ماني عال لو صحتي عال
شفني من الصدمات نفسي عليله
أشيل حمل لو يشيلنه جبال
والله وأمانه غير تصبح نثيله
أرمي من هموم الزمن وأسحب أدبال
وأنزل عن الجوكر وغيري يشيله
من كثر ماشفت بحياتي من أنذال
بديت أحس إن النذاله فضيله
ماطاح من عيني رجل طاحوا رجال
ورجال ماهي يانديمي قليله
أقرب من اللي قالهم ضمن ماقال
راكان بن حثلين راع الجزيله
(هذا ولد عم وهذا ولد خال وهذا رفيق مايدور بديله)
سبحان منهو يالخوي غير الحال
وحط الجفا بين الخليل وخليله
هذا الزمن يبغاله لسان دلال
من يستحي هالوقت واعزتي له
وقت به (الراعي) غدى راعي دلال
والذيب مع طاريه يرفع عويله
ومن كان ساسه للردى مضرب أمثال
اليوم تحسب هيبته عن قبيله
المال ياأهل المال ملعون لا مال
ذل العزيز وعز ناسا ذليله!!
الإثنين نوفمبر 16, 2009 8:13 pm
