جتني تشكى من عنا الدهر فيها
جتني تقول جروحها ألوان وأشكال
جتني وأنا قلبي حزين عليها
جتني وأشوف بعينها كل غربال
قامت تلعثم وأختلط مع حكيها
نغمة حزن أضفت على الصوت موال
ظلم الدهر شن المعارك عليها
كن البنيه مهره والظلم خيال
لحظة تأمل وقفتني بيديها
ضميتها وقامت تشاهق كالأطفال
عانقتها ودموعها تنتشيها
وفتحت أنا قلبي لجل تشكي الحال
فجأه لقيت العين تنظر إليها
شاهدت أنا منظر يلين له جبال
شفت الفراق بعينها يحتويها
شفت الكحل عالخد مع دمعها سال
فزيت أنا فزت شجاع يبيها
حبي لها اللي كان يبقى ولا زال
هاتي همومك حمليني أبيها
أبغى أشيل الهم والهم ينشال
أبغى أكون بدنيتك مهتويها
هاتي يدينك وأنسي القيل والقال
إنتي حياتي لا حياتي ماأبيها
إلا وإنتي بوسطها بكل الأحوال
يابنت هاتي دمعتك أحتريها
أستغفر الله دمعتك (للوضو) ازلال
وإن كان قصدك دنيتك إتركيها
خليني أسرح في سما الحب وأختال
يالله تعالي وبسمتك إفرديها
إما نفعتك وإلا مانيب رجال
وكل الهموم السابقه إنكريها
وناقف أنا وإنتي معا ضد الأهوال
بمسح دموعك ضيقتك إرفعيها
وجازي ليال الظلم والهم بإهمال
والله ترى الدنيا حقيره وفيها
فيها الكريم وبسطها كل الأنذال
حطيت أنا يدي بممسك يديها
وأبحرت أنا والغاليه فوق الأمال
رحنا لديره وردها مكتسيها
وعشنا حياة الحب أيام وليال!!